နိုဝင်ဘာလ ၈ရက်။ ကေအိုင်စီ
ထိုင်း-မြန်မာနယ်စပ် ဘုရားသုံးဆူမြို့တွင် ယနေ့မနက် ၁၁နာရီကျော်အချိန် နအဖနှင့် ဒီကေဘီအေတပ်ဖွဲ့တို့ တိုက်ပွဲဖြစ်ပွား ခဲ့ပြီးနောက် မွန်းလွဲ ၂နာရီကျော်အချိန်တွင် ဒီကေဘီအေဘက်က ဘုရားသုံးဆူမြို့ကို စတင် သိမ်းလိုက်ပြီဟု သိရသည်။
ကေအဲန်ယူ တပ်မဟာ(၆)ပြောရေးဆိုခွင့်ရှိသူ ဗိုလ်ကြီးစောထဲနေက “ဒီမနက် ၁၁း၁၅မိနစ်အချိန်မှာ ဗိုလ်နော်တယာ ဦးဆောင် တဲ့ ဒီကေဘီအေ တပ်ရင်း(၉၀၇)နဲ့ နအဖ ခလရ(၂၈၃)၊ ခမရ(၄၀၅)တပ်ရင်းတို့ကြား ဘုရားသုံးဆူနှင့် မဲ့ကသာသွားရာလမ်း ရပ်ကွက်(၄) နအဖ တပ်စခန်းမှာ တိုက်ပွဲ စတင်ဖြစ်ပွားတယ်။ လောလောဆယ်တော့ နအဖတပ်တွေ တပ်ကုန်းကို အကုန်နေ ရာရွှေ့လိုက်ပြီ။”ဟု ပြောသည်။
လက်ရှိအချိန်တွင် ဘုရားသုံးဆူမြို့တဝက်ခန့်ကို ဝင်ရောက်သိမ်းဆည်းနိုင်ပြီဖြစ်သလို နအဖ ကြေးနန်းဆက်သွယ်ရေးရုံး၊ စိုက် ပျိုးရေးရုံးကို ဒီကေဘီအေ တပ်ဖွဲ့ဝင်များက ဝင်ရောက်မီးရှို့ဖျက်ဆီးလိုက်ပြီဖြစ်ကြောင်း စောထဲနေက ပြောသည်။
နအဖ ခလရ(၂၈၃)မှ စစ်ဗျူဟာ(၃)ထံသို့ အစီရင်ခံ တင်ပြရာတွင် ဒီကေဘီအေအဖွဲ့မှ အေဝမ်း ဦးစီးသော အင်အား ၆ဝဦး သည် ဘုရားသုံးဆူ အခြေစိုက်သည့် ၎င်းတို့နယ်စပ်စခန်းအား လက်နက်ငယ်များဖြင့် ဝင်ရောက်တိုက်ခိုက်သဖြင့် နအဖဘက် မှ ၄၀-မမ ဖြင့် ပြန်လည်ခုခံနေကြောင်း ဖော်ပြထားသည်။
ကေအဲန်ယူ တပ်မဟာ(၆) ဗျူဟာမှူး ဗိုလ်မှူးကြီးစောဂျိုးဆွာက ဒီကေဘီအေအနေဖြင့် ရှေ့ဆက် စစ်ရေးအရ အကူအညီ တောင်းခံလာပါက လက်တွဲလုပ်ဆောင်သွားမည်ဖြစ်ကြောင်း ပြောကြားခဲ့သည်။
ထိုဒေသတွင် ဒီကေဘီအေတပ်ဖွဲ့အပြင် ကေအဲန်ယူ/ကေအဲန်အယ်လ်အေ ငြိမ်းချမ်းရေးကောင်စီနှင့် မွန်ပြည်သစ်ပါတီ အဖွဲ့ ဝင်များလည်း အခြေစိုက် လှုပ်ရှားလျှက်ရှိသည်။
ဘုရားသုံးဆူမြို့တွင်း၌ ယခုလို တိုက်ပွဲဖြစ်ပွားမှုကြောင့် မြို့ခံများ အထိတ်တလန့် ဖြစ်ပွားနေသည့်အပြင် အထုပ်အပိုးများ ပြင် ဆင်နေကြောင်း မြို့ခံတစ်ဦးက ယခုလို ပြောသည်။
သူက “အစိုးရတပ်နဲ့ ဒီကေဘီအေတပ်တွေ ပစ်ပြီ။ အခု မြို့ခံတွေကတော့ ကိုယ့်အထုပ်အပိုးတွေ သိမ်းဆည်းကြပြီ။”ဟု ပြော သည်။
